福娘童話集 > 日本昔話 > １月



絕對無這種事情

・日本語　・日本語＆中国語　・客家語　・日本語＆客家語

客家語 : 鄧文政(ten33 vun55 zhin11)

　頭擺頭擺，有一個人安到吉四六，逐日過著盡樂線。

　在吉四六先生戴个莊內有一個當好聽人講話又盡有錢个老阿伯。
　因為佢摎各種人講話也聽了盡多，若係聽到盡生趣个話時節
　一定會講：「絕對無這種事情。」
　所以這下無人愛摎佢講話。
「無聊哪！有麽人愛摎𠊎講話無？」
　老阿伯在該想个時節，堵好吉四六先生經過，老阿伯求吉四六摎佢講話。
「做得啊！先講好，毋好在談話个半站仔講『絕對無這種事情。』做得無？」
　吉四六聽到「好啦，假使講出來就愛罰一袋米。」後，就摎老阿伯約定。
「恁樣做得開始講咧。」
　在店亭下坐等，吉四六先生開始講：
「頭擺頭擺有一個國个國主坐在盡派頭个轎頂，帶等管家出門去旅行，
　國主个轎行到山路个時節，毋知哪位飛來一隻扡婆，
『pi~hyororororo』叫，還在周圍捩捩轉，飛過來飛過去在該跳舞。」
「fumu，恁樣哪？」
「麽个叫聲恁好聽，在哪位叫？』，國主打開窗門，探頭出來時節，扡婆飛兼來一片叫一片『噗』聲屙堆屎在國主短和服个衫袖頂。」
「fu~mu，恁仰噢。」
　老阿伯拿出一袋米係盡難个事情，所以佢隨時注意無論哪量時都做毋得講出常透講个口頭禪。
「國主吩咐管家講：『噯！拿領短和服分𠊎換！』，拿來後就換好了。」
「有影，有影」
「短和服換好以後行一站仔，頭下該个扡婆
『pi~hyororororo』叫，國主又打開轎門，身体伸出去，這下扡婆个屎屙到國主个刀仔頂。」
「fu~mu，絕對．．．」
　老阿伯開嘴講又煞煞停下來還險哦！
「國主吩咐管家去拿過支刀仔來換，
　過一下仔，頭下該隻扡婆『pi~hyororororo』叫，
　國主又打開轎門，身体伸出去，這下扡婆个屎屙到國主个頭那頂，
　國主命令管家『噯！去拿个頭林來分𠊎換』，用自家个刀仔摎自家个頭林刴下來，
　管家拿來分佢換个頭林裝上去，繼續去旅行。」
　老阿伯不知不覺大聲講「絕對無這種事情！」
「hei！承蒙你个一袋米來。」

　斯恁樣，吉四六先生在老阿伯該贏著約定个一袋米，遽遽轉去。

煞咧

吉四六先生；實際有這个人，戴在大分県大野郡野津町，經營酒類製造个第一代廣田吉右門。
　這下還看得著碑石、牌位等遺跡，但係，係毋係吉四六先生本人个，並無確實个証據。
　傳說故事肚代表古琢个人物，盡即靈又非常狡猾个人、或者憨憨个人。
　吉四六先生个故事當多，有二百條以上，毋過一半以上係這幾年創作。