福娘童話集 > 日本昔話 > １月


イラスト　thin-p@A'sf

會聽話个頭巾

・日本語　・日本語＆中国語　・客家語　・日本語＆客家語

客家語 : 鄧文政(ten33 vun55 zhin11)

　頭擺頭擺，一個老阿伯戴在四圍分山包等个深山肚。
　佢逐日朝晨背等張樵个擎仔行入山頂。
　續等，歸日在該撿樵。
　今晡日摎往日共樣在山頂擎等淰淰个樵下山來。
「慢慢行來去轉，ng24！該係麽个東西？」
　老阿伯想愛轉个時節看到一條狐狸子，拚死命想愛摘樹頂个菓子。
「e24，毋係狐狸嘎？」
　這條狐狸子像形脚毋好，毋管佢幾努力都無法度順利摘到菓子。
「好！好，𠊎來摘看哪。．．．yokkorasho。這分你食，𠊎愛來去走咧。」
　狐狸子可能係因為老阿伯个親切感覺相當歡喜敢？目珠一直看等老阿伯个背影送佢走。
　有一日老阿伯去街路買東西，轉个時節當夜了，
「無遽兜斯。」
　老阿伯在該暗摸胥疏个路上，三步做二步走，該狐狸子在崎頂等佢。
「該毋係頭過該條狐狸子嘎？」
　仰會像形當熱心摎老阿伯擛手。
　老阿伯跈狐狸子个後背行等去。
　狐狸子因為脚毋好，拖等行，拚死命愛渡老阿伯去哪位樣。
　等去到正知竹頭下該位係狐狸戴个竇。
「ho，這位係你屋下麽？」
　狐狸屋下有狐狸媽媽，因為發病仔所以在該睡等。
　狐狸媽媽緊同佢鞠躬感謝。
　看得出盡像愛答謝佢摎厥倈仔𢯭手。
　同時在間肚拿麼个東西出來。
　該係一條盡舊个頭巾（𠖄帕）。
「雖然該係屙屙糟糟个頭巾（𠖄帕），這東西愛送分𠊎樣，該就承蒙你了。」
　老阿伯，感謝佢並接過頭巾（𠖄帕），過後一儕人行原來該條路行轉去。
　狐狸子目珠一直看等老阿伯个後影送佢走。

　第二日，
　老阿伯在天墀坪破樵，毋知麼个東西輕輕跌到厥脚下。
「這毋係昨暗晡狐狸送个頭巾咩？．．．試戴看看哪。」
　老阿伯就將頭巾戴起來，開始繼續破樵。
　過後，
「屋下个主人歸日在竇肚睡目，這下昶肥了，飛起來當辛苦。」
（ho53，係瘦夾夾个純五郎，你屋下个主人嘎）
　老阿伯个耳空聽到，無知麽个毋識聽過个講話聲：
「奇怪，確實有人講話，到底係麽人？」
　看看屋肚又無半儕。
「樹林裡背肚个中吉，聽講肚屎痛，身体變到盡弱。」
「該係樹子食忒多咧。」
　老阿伯又注意到聲音。
「還奇怪呢！像有麼儕在該樣．．．還係無人。」
　老阿伯再過看一擺屋肚，忽然間看自家頭那頂。
「ng24？可能係這頭巾个関係。」
　老阿伯摎頭巾脫下來、戴上去，試看有麼个爭差無？。
「果然係這？」
　戴狐狸送个頭巾，就聽得到動物、草、樹仔講話个聲音，還奇妙个頭巾。
　老阿伯想著狐狸會送恁重要个東西，非常歡喜。

　第二日開始，老阿伯去山頂比頭過還阿快樂。
　戴等頭巾做得聽到鳥仔、動物講話。
　停在樹椏講話个鳥仔。
　樹頂講話个松鼠。
　大家快快樂樂在該打嘴鼓。
　老阿伯在山頂一片撿樵一片聽鳥仔、動物打嘴鼓暢到耐毋得。
「𠊎喉嗹頦著傷，唱歌仔完全無信心。」
「無該種事情哪，聲音特別好啦！」
「有影無？無該共下唱！」
　仰會連蟲仔講个話都聽得著。
　老阿伯就恁樣形歸暗晡在該聽蟲仔唱歌仔。
　一儕人過日仔个老阿伯，因為恁仰毋會再過孤栖咧。

　有一日，
　老阿伯在山頂擎樵轉个時節，樹尾頂有二隻烏鴉，毋知在該講麽个？
　老阿伯拿出頭巾戴起來，注意聽烏鴉講話。
「有錢人个妹仔啊。」
「係呦，病盡久咧，厥妹仔个病聽講係天墀坪該頭樟樹作怪。」
「該頭樟樹作怪？麼个啊！」
「該係樟樹个談話中聽到个哦！」
　聽到烏鴉个閒談，老阿伯煞煞去有錢人屋下。
　有錢人非常難過。
　一個妹仔著病橫在該。
　老阿伯該暗晡斯在倉庫肚歇。
　戴等頭巾，等看有麼个事情發生麽？
「恁痛喔！恁痛喔！」
　聽到倉庫外背像形樟樹个叫聲。
　竹柏樹摎松樹喊樟樹講：
「做麽个呢？樟樹。」
「哦，大家好！看𠊎恁好个身材，新个倉庫起到𠊎囊腰頂，還艱苦！還艱苦！」
「該當麻煩呢！」
「所以啊，𠊎就當恨恁樣起倉庫个有錢人，摎厥妹仔舞到發病仔，添兜麻煩分佢。」
　倉庫肚个老阿伯聽到樟樹講个話後就當安心咧。
(摎倉庫處理好，妹仔个病定著會好。)

　第二日，
　就摎有錢人報告這件事情，
　有錢人黏時改變倉庫个場所。
　過一站仔倉庫个重量拿走咧，樟樹恢復元氣，生出歸樹淰淰、青青个葉仔。
　妹仔醫毋著个病完全好了。
　有錢人當歡喜送一大堆寶物分老阿伯。
「這係打幫狐狸送个頭巾正有个喲，愛買兜狐狸愛个東西分佢。」
　老阿伯買兜油烰个豆腐，行山路轉屋下去。

煞咧