福娘童話集 > 日本昔話 > １月



老阿伯摎天狗

・日本語　・すぺいんご(espanol)　・客家語　・中国語

・日本語＆客家語　・にほんご(japones) ・ すぺいんご(espanol)　・日本語＆中国語　

客家語 : 鄧文政(ten33 vun55 zhin11)

　頭擺頭擺，有一個耕種个老阿伯牽等一條馬，一片唱歌仔一片順山路緊行。
♪ 快樂
♪ 若係去山排
♪ 連馬鈴聲都會應聲
♪ e~isora hoi hoi
　緊行緊行，怱然間有一種當大个脚步聲zushin zushin在對面傳過來，大天狗來了。
　講著大天狗个鼻空，就像老阿伯个手脾恁長恁大，講著大天狗面，比神社个鳥居塗个紅色還較紅个大色。
　大天狗摎老阿伯在細細條个山路項相堵頭。
「噯！老貨仔！借過！」
　雖然天狗恁大聲講，老阿伯也無半滴驚佢，應講：
「喊𠊎分你先過？！這條路毋單淨係𠊎，還摎馬共下行。你愛讓路正著。」，目盯盯看等大天狗。
「hi hi、hi hi~n！」
　馬也大聲噦，摎老阿伯𢯭手。
「這個老貨仔，還愛硬詏，等下捉來食食忒佢！」
「係無？𠊎食到恁多歲咧，分你食忒也不會驚，毋過分你食忒以前想愛看一隻東西。」
「麽个，哪隻東西？」
「大家都傳說天狗會法術，毋知有影無？」
「哇哈哈哈！𠊎係天狗王呢！連法術又毋曉還愛做麽个天狗王！」
「係哦，聽講天狗這東西，無論那隻天狗都會變到堵天恁大，毋知你會無？」
「大到堵天？連這又做毋到還愛做麽个正好！」
「有影無？！該恁仰好啦，𠊎分你食忒以前變分𠊎看做得無？流傳萬世。」
「好！看較真兜！」
　大天狗頭那臥起來鼻孔向往上，go~聲吸一口大大个氣。
　過後gun gun gun gun，大天狗變大，緊來緊高續等穿過雲。
　所以老阿伯笑微微，非常佩服樣，講：
「天狗先生，天狗先生，了解咧，變轉原來恁大。」
　過後，大天狗斯jiu~聲，摎氣敨出來，變轉原旦恁大仔。
該介條天狗對老阿伯講：
「仰般！老貨仔，嚇著了呵？好咧！做得摎你食忒吂？」
　老阿伯對該條手伸長長个大天狗哈哈大笑講：
「該隻事情係恁樣無毋著，你會變堵天恁大，毋過滿哪仔个天狗乜會變，敢毋係？
　你頭先講過你係天狗王，可能無辦法摎頭那變細。」
「麼个啊！𠊎係日本第一等个天狗，毋係單淨會變大毋會變細个毋壁天狗。看好，𠊎變分你看哪仔！」
　天狗講阿煞、fu聲敨下氣，
　斯慢慢仔緊變緊細，像老阿伯个手指尾恁大仔定定。
　過後，老阿伯忽然間摎大天狗捉起來放到手巴掌。
「哦！再過較細！再過較細！係恁樣，就係恁樣。」
　包尾大天狗變到像一粒豆仔恁大仔。
「好勢咧。」
　老阿伯摎大天狗捉起來，輕輕仔放落嘴肚gud lud聲吞落肚屎肚去。
　過後，
♪ 青青个天下背 ♪ 緊挲馬个鬃毛 ♪ 柔柔个春風 送到村莊 ♪ e~sora hoi hoi
　包尾佢就一片唱歌一片牽等馬，行轉屋下去。

煞咧

註:
百姓：耕田、耕園種農作物過日仔个人。
江户時代个人，大部份係耕種人，佢兜大部份日仔過著盡苦。
雖然苦，毋過性格硬頸、身體紮磳， 所以用耕種人做主角个故事盡多。

鳥居：在神社參拜个路口，表示神社个地界个一種門，左片、正片二支楯仔頂高架兩支橫木連接下背二支楯仔。
伊勢神宮摎鹿島神宮个神明鳥居為基本，後來正做明神鳥居、山王鳥居、三輪鳥居、兩部鳥居。
頭過、為著願望達成包紅包答謝神明，捐錢起鳥居个故事盡多。

天狗：人類想像戴在深山肚个怪物、人个樣相、紅面、鼻孔高高、有生翼又有法術，做得手拿 扇仔，滿天飛來飛去撥出大風來。
天狗个朋友裡肚也有烏鴉面个烏鴉天狗。