福娘童話集 > 日本昔話 > １月



有名个倒樹人善六

・日本語　・日本語＆中国語　・客家語　・日本語＆客家語

客家語 : 鄧文政(ten33 vun55 zhin11)

　頭擺頭擺，有一個安到善六个倒樹人。
　生到盡高大毋過盡懶ㄕ，一日做个事無人做半日恁多。
「善六啊，像你這種脚士下二擺會變大人物。」
　大家認為善六毋係有名个倒樹人，係細倒樹人，看佢毋起。
　善六聽著非常毋歡喜。
　所以佢去就近个神社參拜，祈求成為日本第一个倒樹人。
「無論仰般愛賜𠊎，摎神社面前揾等該條石牛鋸開來恁大个力量。」
　盡遽，許願期限會滿个日仔到咧。
　善六試摎揾等个石牛鋸看啊。

　gi11 ko11gi11 ko11．．．

　善六个鋸仔一下仔就摎石牯做个牛鋸做二析。
「成功咧！𠊎毋係頭擺个『細倒樹人』善六哦！從今以後係毋係愛喊𠊎『有名个倒樹人』善六！？」
　毋過去到山頂開始做事个時節，完全無法度做事。
　做得摎石牛鋸做二析个鋸仔無辦法鋸樹仔。
　看到這種情形个師傅哈哈大笑。
「善六啊，求神許願會講毋著麽？鋸樹做个事摎鋸石牯無共樣！」
　聽到師父恁樣講善六正昏醒。
「有影，𠊎想有力就好，忒沙鼻也無一定。好，再過去求神許願。」
　悔改以後个善六，目珠流出目汁。
「神明在上，𠊎毋著咧，愛鋸大樹仔毋係鋸石牯，請你保佑𠊎。」
　善六歸暗晡鋸好一頭大樹个時節，善六个手脾起一個像石牯樣个大肉硈。
　自該日以後善六歸個人變忒咧，煞猛做事。
　煞猛以外又實在，大家都阿𧩣。

　成時去江户工地現場做事。
　頭家看著善六背等大鋸仔，想撩佢一下。
「噯！後生條仔，鋸成垤來看，毋過愛照畫个墨線來鋸哦！」
　講忒就拿墨斗出來在一枝大樹畫一條海浪樣个墨線。
「好！」
　善六簡單應佢後，一下仔就照海浪个樣仔鋸好了。
　用大鋸仔鋸出像這恁難个樣仔，係盡困難个事情。
「這𠊎輸你，了不起！」
　因為這善六在江户乜變盡出名。

　 聽講倒樹仔个同事傳言講：
「善六啊！該毋係普通个倒樹人。係有名个倒樹人，該種程度个人在江户地方無第二儕人。」

煞了