福娘童話集 > 日本昔話 > １月


少爺斯一個

・日本語  ・英語 ・中国語　・客家語

・日本語＆英語 ・日本語＆中国語　・日本語＆客家語

客家語 : 鄧文政(ten33 vun55 zhin11)

　頭擺頭擺，有一個人安到彥一个人，非常聰明伶俐。
　有關佢个風聲，漸漸向就近个街路、村莊流傳出去，包尾傳到城主耳孔肚去了。
「旣然恁聰明，無就來辦一擺精靈比賽仰般？」
　為著這，彥一就分人喊到城主屋下去，
　彥一到了後就在大廳坐正正，無幾久城主就出來摎佢講：
「該個係在地方上大大有名个彥一哪
　精砉砉个面臥起來。
　．．．hohou、毋好趜精頭精面个樣相哪！
　毋過有一个摎你差毋多大个後生人，
　佢這下開始係摎你搞个伴。」
　城主講煞後，管家喊少爺出來。
　過一下仔，紙門打啊開來，一儕、二儕、三儕、四儕、五儕人著等共樣衫褲个細人仔，一個一個落來。
　毋單淨著个衫褲共樣共樣，
　五儕生著像双胞卵樣，像到無跌忒。
「仰般，彥一，
　你正經揣得出哪個係少爺無？
　這下，你若係做得用傳說个智慧揣著，斯會得著獎賞！」
　連在脣頭个管家乜無自信認得出少爺來，
　看都無看過个細人仔，這下頭一擺見面無可能認得出來，城主想到這就當得意。
「仰般，若係認為忒過分做得先老實講。」

　但係彥一笑微微仔講：
「逐儕看著都共樣共樣，看著當相像呢。
　毋過對𠊎來講，正經少爺本人早就認出來了，
　練習書法之後少爺本人个手會膏著烏墨。」
　分這句話騙著咧，少爺本尊睞一下自家个手，其他个細人仔全部在該偷看，仰般尋就尋毋著鳥墨跡。
「城主，該儕就係少爺。」
　城主對彥一个聰明智慧非常佩服。
「𠊎輸分你囉，照約定愛分你獎賞。」
　因為這件事情彥一得到像山恁高个獎品。

煞咧

註:
彥一：摎吉四六先生或者一休先生共樣，日本童話故事裡肚係聰明伶俐个主角，彥一摎面前該二儕無共樣，佢係一個想像个人物。
　熊本縣球磨郡摎八代郡所流傳个故事，有名个木下順二个劇曲『彥一〈彥市〉故事』，像彥一恁樣个故事，全國各地有當多，較有代表性个係鹿兒島个老蛤蟆侏儒〈じゆじゆ〉、佐賀个勘右衛門、兵庫、岡山、島根个彥八、石川个三右衛門、山形个佐兵等。
　摎吉四六先生个故事當相像，毋過實在个人物吉四六先生為主个對手係村長，相對來講，想像个人物彥一為主个對手係城主，這係最大个差別。