福娘童話集 > 日本昔話 > １月



懶ㄕ牯摎窮苦神

・日本語　・中国語　・客家語

・日本語＆中国語　・日本語＆客家語

客家語 : 鄧文政(ten33 vun55 zhin11)

　頭擺頭擺，有一隻所在，戴一個當懶ㄕ又苦个細倈仔。

　 有一年年尾，細倈仔肚屎當枵，強強忍等在火缽脣睡目，毋知麽个東西biang11聲對天蓬頂跌下來。
「麽，麽个？」
　細倈仔著驚一下跳起來時節，跌下來个係一個著等一身衫褲爛爛款款屙屙糟糟又窮苦樣个老阿伯。
「麽个東西，你這個！在𠊎屋下天蓬頂做麽个？」
　該個老阿伯，一片搖頭拂腦一片完身緊爪，應講：
「𠊎係戴這間屋、受到你个照顧盡久个窮苦神。」
「窮苦神？噯！這間屋有一抑係二個窮苦神無麽个好奇怪，你仰般會跌下來？」
「ng11，實在講，
　你嶄蠻仔苦，這屋下無半息東西好分𠊎食，
　就連𠊎个命嗄摎你共樣恁樣過一生人，
　所以想愛逃走，但係肚屎空空使毋出力來，嗄跢下來，還慘哪！」
「恁樣係無，𠊎敢會苦到連窮苦神也想愛逃走个程度？
　出去別位也好，𠊎愛承蒙你，
　至少愛送你出門，毋過𠊎乜肚屎當枵無法度停動，
　反正毋好个東西你自家去好啦！」
　窮苦神摎講啊煞又想愛睡目个懶ㄕ細倈仔講：
「he53，想愛睡再過等一下正睡，先聽𠊎講，
　𠊎雖然係一個窮苦神，也做得講盡風神个神，
　受你恁多年个照顧，無報答你半點錢就走過意毋得。
　所以𠊎愛教你一樣好東西。」
「好東西？」
「著！天光朝晨日頭出來个時節有背等寶物个馬經過你屋面前，
　第一條馬背金仔，
　第二條馬背銀仔，
　第三條馬背銅，
　哪條你都做得用棍仔毆佢。
　毆到該條馬个寶物就變你个了。」
「有影，確實係好空个話，
　斯做得毆一條定定係無？
　三條全部打做毋得係無？」
「呵呵呵。
　麽个啊！還貪心哦！
　當然，三條全部都做得毆，
　假使單淨毆第三條馬，你做過普通个日仔。
　假使加毆第二條馬，你做過豐湧个日仔。
　假使加毆第一條馬，你斯變做大有錢人了。
　毋過呢，單淨最尾通過个第四條馬絕對毆毋得哦，
　因為該條馬係𠊎出去愛騎个。」
「𠊎知！最尾背通過該條馬毋好毆佢。」
　細倈仔講阿煞又睡忒了。

　第二日朝晨，應該摎日頭同時䟘床个細倈仔，還係摎平常共樣懶ㄕ慣咧，賴睡一下。
「壞蹄咧！睡過䢍咧！」
　細倈仔緊觸觸像飛樣走出去，背等當靚介包衭仔个馬堵堵要經過厥屋下面前。
「好！堵堵赴得著，該條像係背金仔个馬樣，拿著該兜東西𠊎斯變大有錢人了。」
　佢在禾埕擎著一支曬東西个竹篙，走出去對準馬个頭那，
「ei！」
　因為竹篙昶長挽著路脣个樹椏仔，
　該量時背等寶物个馬，不慌不忙行走去。
「壞忒了！
　背金仔个馬走到無魂無影囉！
　．．．無相干，哪係毆著還伸著个背銀个馬摎背銅个馬，𠊎還係做得變大有錢人，
　好！這下換較短个棍仔。」
　細倈仔斯去灶下拿擂麻仔个『擂棍』，在該等第二條馬來。
　無幾久仔、又有一條馬，背等當靚个包衭經過屋面前。
「好！這條應該係背銀仔个馬！這擺，ei！」
　細倈仔擎起擂棍對準馬个頭那聲毆落去。
　可惜擂棍昶短，仰般毆都毆毋著。
　背等寶物个馬在細倈仔脣頭、慢慢行過去。
「壞忒咧！又失敗，這擺愛用長息仔个棍仔來試看啊仔。」
　所以佢擎支擔竿在該等下一條馬。
　無幾久有一條馬來咧，毋過這條馬無背東西。
「奇怪呢？背銅个馬仰會麽个東西又無背。
　儘採好，這條馬摎佢留下來，至少做得過普通个日仔。」
　佢擎起擔竿對準馬个頭那毆落去。
　gochi~n！
　好死毋死擔竿的對打到馬个頭那，馬就恁樣biang聲橫落去，死翹翹囉。
「毆著咧！背銅个馬分𠊎打死咧。」
　細倈仔當暢个時節，屋下天蓬頂跌下來个窮苦神行出來，非常个失望講：
「啊！你做麽个？
　你摎𠊎愛騎个馬㓾死忒，還慘哦！
　總講，想愛來去別家人該戴，這下出大門毋得咧。
　．．．無法度，以後還愛戴你屋下分你照顧！」
　所以懶ㄕ細倈仔，還係繼續過等貧苦个日仔。

煞咧