福娘童話集 > 日本昔話 > １月



木匠摎花貓仔

・日本語　・中国語　・客家語

・日本語＆中国語　・日本語＆客家語

客家語 : 鄧文政(ten33 vun55 zhin11)

にほんご(日语)  ・ちゅうごくご(中文)　・日语＆中文

　頭擺頭擺，在江户个神田有一個木匠。
　因為餔娘過身忒咧，逐日過著當孤栖，佢畜一條盡得人惜个花貓仔。
　木匠逐朝晨，先準備好貓仔愛食个飯正出門去做事。
　臨暗仔，事做忒了轉夜个時節，佢會買兜貓仔好食个魚仔轉去。
　貓仔乜盡愛木匠，見擺聽著佢个脚步聲就躍出來迎接。
　毋過有一日，木匠个目珠痛。
　所以去看先生，先生講：
「這目珠个病盡嚴重哦，盡失禮，𠊎个能力無辦法摎你醫。」
　過後，木匠就無辦法出門做事，嗄變到當苦，
　當然乜無法度買魚仔分貓仔食。

　有一暗晡，木匠摎貓仔講：
「貓仔啊！𠊎个目珠發病仔咧，變著白白汶汶，像人醫毋著咧，
　無辦法出門做事，日仔緊來緊苦，照恁仰下去可能連你嗄會畜毋起。
　愛仰結煞正好哪？」
　木匠緊講緊講，毋多知嗄睡忒。
　貓仔像形聽得識木匠講个話樣，就細細聲仔『miau』一聲就偎兼去，開始緊舐木匠个目珠。
　正片析舐好又舐左片析个目珠。
　等木匠注意到，想毋著有恁奇怪个事情，目珠分佢舐舐過後，感覺心情特別好，就任在貓仔舐。
　自該下以後，貓仔一有閑就去舐木匠个目珠。
　恁樣做幾日仔，奇怪个事情發生了，木匠汶汶个目珠漸漸變清。
　過了十日定定，木匠个目珠完全好了，兩隻目珠就做得看東西，看當清楚。
　但係在該下開始貓仔个目珠變白白汶汶，包尾，貓仔个目珠完全看毋到。
　雖然恁樣，佢無麽个好愁个事。
　目珠醫好个木匠，比頭過還較惜該條青瞑貓仔，佢完全毋會有半點毋方便，逐日摎木匠過等幸福个日仔。

煞咧