福娘童話集 > 日本昔話 > １月



牡丹花摎後生人

・日本語　  ・中国語　・客家語

・日本語＆中国語 　・日本語＆客家語

客家語 : 鄧文政(ten33 vun55 zhin11)

にほんご(日语)  ・ちゅうごくご(中文)　・日语＆中文

客家語 : 鄧文政(ten33 vun55 zhin11)

　頭擺頭擺，在能登國（現在个石川縣）戴一位後生農夫。
　從細就盡愛樹仔摎花草，時常會去山頂尋兜珍貴个花、草轉來屋下，種在天墀坪角頭，無就種在花缽，小心照顧。
　後生人在深見山行个時節，毋知那傳來个香味。

　有一年熱天某日个事。
　後生人在深見山行个時節，毋知那傳來个香味。
　有息甜味又有息酸味，一種盡奇怪个花香。
　有關花个事情，麼个就知个後生人，這種香味係佢第一擺鼻到。
（到底係麽个花呢？），
　後生人順等花个香味行等去，行到深山肚。

　佢就看看四向頭看一下仔，看到龍峎對面山有一个水紅色个花園。
　佢就遽遽盤過龍峎向該花園个方向行等去。
　行到無路好行个深山，後生人忽然間頓恬下來。
　該位个地形斯像馬背囊樣，無論係左片析抑係正片析都係當嶇个岩石山。
　一心想愛看花，佢捉等石頭、樹根像猴仔樣爬等去。
　總算到了該位，看到裡肚開歸片仔花會晟人个花園。
　從生人毋識看過恁大个牡丹花，相爭開。
「啊，這種山頂，有這恁靚个牡丹花，毋過季節毋著呢。」
　想到這恁奇怪个事情，對盡愛花个後生人來講，該種餳人入夢樣个香味，佢心肝哱哱跳，見擺看花看到呆忒。
　恁多花裡肚開到特別萋頭个大牡丹花還阿餳佢。
「啊！這種花拿轉屋下丹墀坪種若係會開花，毋知幾靚哦！」
　無想到當當在該呢呢哪哪个時節，
　忽然間花影下背走出一個少女來。
　像係仙女恁靚个少女。
（這種位所會有人，像係仙女？）
　雖然感覺恁奇怪，佢還係緊捉少女看。
　少女恬恬接近後生人脣頭，笑咪咪講：
「該花拗一蕊分𠊎哪。」
　該聲音當靚盡好聽，後生人著驚一下。
「仰般，該花拗一蕊分𠊎哪。」
　少女手指該大蕊又靚个牡丹花。
「好，好，毋過這毋係𠊎个花園，麽个花都做毋得儘採拗。」
「做得啊！這係𠊎兜个花園，該花乜係𠊎兜个，仰般，用你个手．．．用你个手拗分𠊎。」
　該聲摎頭下無共樣，特別孤栖。
（自家个言語傷到少女个心抑無一定）
　後生人恁想樣想，將手指指該蕊花拗下來，拿分少女。
　當下後生人毋會敨氣，忽然間橫下去。

　毋知經過幾久？幾遠个地方？麽儕在該喊佢？
　擘開目珠來看，看到一個老人家在該照顧佢。
「哦、醒咧係無？」
　老人家來這位撿樵，發現後生人像死忒樣橫在這位。
「你對這恁高个崩崗石壁跢下來，該載無麽个大著傷。」
　老人家摎後生人牽䟘起來背下山。
　石壁頂該蕊大牡丹花，恬恬看等這身影下山。
　該花頂像仙女个目汁樣个露水金晶𥍉亮。
　等佢轉到屋下奇怪个事情發生了，山頂看到該大牡丹花在屋面前開等在該。
「．．．這係」
　想毋解个事係花自該量時開始逐年、逐年、毋管哪量時都共樣開到當靚。
「這牡丹花敢係該個靚靚个龍宮仙女？」
　後生人對該牡丹花非常个痛惜，聽講一生人無討夫娘。

煞咧