福娘童話集 > 日本昔話 > １月



毛蟹揇腰交

・日本語　・日本語＆中国語　・客家語　・日本語＆客家語

客家語 : 鄧文政(ten33 vun55 zhin11)

おりがみをつくろう ( おりがみくらぶ より) かに① 　　　かに②

　成為大將軍後，秀吉戴在大阪城，
　城內有一個盡淨个水池，池肚放有黄金做个毛蟹。
　毋只一、二隻，
　大大小小有幾百隻，金晶𥍉亮，
　毋過秀吉這下愛徙到新起个京都城。
　所以秀吉高不將摎水池肚金毛蟹送分管家。
「金毛蟹分你大家，毋過毋係麼儕都拿得著，
　麼个原因愛得著毛蟹？
　毛蟹愛做麼个用？
　講出理由就做得。
　斯愛講出『係恁樣、斯做得分佢毛蟹。』樣箇想法儕、就做得分著。」

　管家大家頭側側想去想轉，講麽个正好，正拿得到毛蟹？
　其中有一儕企出來講：
「大人，𠊎愛做壁龕飾品，一定愛分𠊎一个。」
「哦，愛做壁龕飾品係無？恁樣好，你選一隻較大个。」
「好，承蒙你。」
　該個管家得到大毛蟹，開容笑面。

　過後，又一個管家講：
「𠊎對書盡有興趣，想愛拿來做磧紙个文鎮。」
「正經係麼，文鎮盡好，毋過文鎮做毋得忒大隻該顛倒麻煩，你拿細隻个好。」
「好，承蒙你。」
　該個管家得到小毛蟹，感覺有兜打爽。

　過後，大家各各講出各種理由拿到毛蟹。
「𠊎，倈仔還有孫仔，毋只這恁樣還有後代傳下去，做佢兜个守護神。」
「𠊎．．．」
「𠊎．．．」

　毋過，有一個人安到曾呂利先生，在該恬恬看大家个樣仔，麼个都無講。
「曾呂利，你開始到這下無講半句話，你敢係無愛毛蟹？」
　秀吉問佢个時節，曾呂利用手摸厥面頰，講：
「毋係，當然𠊎乜想愛，毋過」
「毋過，仰般？」
「𠊎个用法，因為一隻毋罅。」
「麼个呀？一隻毋罅用，fumu，到底愛做麼个用？」
「𠊎好愛武个事情，想愛看該兜毛蟹揇腰交。」
「ho，揇腰交係無？原來係恁樣想，好，你捉二隻去。」
「毋係，揇腰交一般分東、西兩軍，還分橫綱、大關、小結、幕下，若無恁樣就無生趣了。」
「哦，確實有影，曾呂利啊，伸个毛蟹全部在該，分你拿轉去好咧。」
「好，承蒙你。」
　曾呂利歡喜到笑咪咪摎伸个毛蟹全部拿轉去。
　因為恁樣，少拿毛蟹个管家講：
「曾呂利該個漦仔會想到揇腰交仔，早知𠊎講愛軍隊大戰還較嬴。」
　後悔到會死。

煞咧