福娘童話集 > 日本昔話 > １月



龍宮仙女送个貓仔

・日本語　・客家語　・日本語＆客家語

客家語 : 鄧文政(ten33 vun55 zhin11)

　頭擺頭擺，一個有三個妹仔个農民。
　三個都嫁京畿外个人，毋知麼个原因斯最大个妹仔日仔過到當苦，連當日愛食个東西有抑無都毋知。
　農民逐年到年尾都會請三个妹仔摎婿郎來屋下。
　較有錢該兩个婿郎會帶等當多酒摎火炭做等路去。
　丈人老還過丈人哀非常歡喜，講：
「歡迎，歡迎！請毋使客氣、落來坐！」又當豐沛來招待佢兜。
　毋過大婿郎因為無錢，逐擺就㧡等山頂撿个樵來，講：
「這樵分你起火用！」
（fumu！斯拿這兜仔東西定定係無？）
　丈人老摎丈人哀看佢毋起，毋識拿豐沛个料理分佢食，連一擺都無。

　今年年尾又請三个婿郎來屋下。
　摎頭擺共樣㧡等樵去个大婿郎，出門以後仰般都無想愛去外家。
（反正去乜分人看毋起，毋當送分龍宮仙女較贏。）
　大婿郎就向海脣行等去，到海脣摎大海講：
「龍宮个仙女，這係年尾个禮物請你領受。」講煞就將樵把擲落海肚去。
「．．．好咧，轉來去屋下好哪。」
　大婿郎想愛轉屋下个時節，無想到海肚走出一個當靚个細妹仔來，摎佢講：
「頭下送𠊎恁好个東西，承蒙你。龍宮仙女想愛送禮物分你，請你摎𠊎共下來去。」
　大細郎著下驚。
「無，無麼个。𠊎無愛麽个禮物，另外𠊎抑毋會泅水。」
「無相干，𠊎會背你來去，請你目珠眨起來，毋使客氣，覆在𠊎背囊頂。」
　因為細妹仔非常親切，大婿郎無法度，高不將目珠眨等分細妹仔背。
　該下像分魍神牽著樣，麽个就毋知。
「到咧，辛苦你哦！」
　佢就慢慢擘開目珠，仰會坐在恁派頭个人客間呢？
　眼前係像山恁高个澎湃个料理，又有恁好聽个音樂好聽。
「慢慢食！」
　啉了細妹仔渟分佢个洒，毋多知嗄細聲呻起來。
　恁好食个酒從生人吂識食過。
　該兜料理分人毋敢相信，世間有恁何食个東西，斯像人發夢樣。
　大細郎嗄呆忒，一直到細妹仔細聲同佢講：
「龍宮仙女若係問你想愛佢送麽个東西分你个時節，請你應講：『麽个都毋使，請你送𠊎一條猫仔就好。』」
（毋過自家恁苦，討到一條猫仔敢會有辦法畜？）
　大細郎當當在該考慮个時節，龍宮仙女在一群著羽毛衫个仙女帶領來到人客間。
「承蒙你送𠊎恁多禮物，所以愛回你禮物作為答謝，有麼个想愛个東西麽？請你摎𠊎講，假使係無个時節，珠寶盒．．．」
（珠寶盒，毋合理！）
　大婿郎大聲講：
「請送𠊎一條猫仔！」
「啊！愛一條猫仔？貓仔在龍宮肚斯正一條定定，係寶呢！
　．．．若係你愛，高不而將送分你好咧。
　龍宮个猫仔一日食一合紅豆，屙一升（一合个十倍大約公升。）个金幣出來。
　請，愛永久惜佢。」
　龍宮仙女講煞，斯將該條得人惜个猫仔送分佢。
　大婿郎揇等猫仔，覆在頭下該細妹仔个背囊。
　目珠眨等，人昏昏麼个就無知，等佢醒个時節既經企在原來該海脣，揇等猫仔。
　大細郎非常个歡喜轉去屋下，摎其餔娘講事情个經過，拿一合紅豆分佢食，過後猫仔个屎胐就
♪ diang ♪ diang響，屙出金幣出來，看等斯有一升了。
　大婿郎用該兜錢去買大尾魚仔摎當貴个衫褲，拿去厥丈人老屋下。
「仰會買恁貴个東西呢？」
　丈人老摎丈人哀暢到跳起來，第一擺拿豐沛个料理請佢食。
「你頭過斯有才調㧡樵把來定定，這下仰會變恁發呢？」
　二老問起這件事情，大婿郎摎龍宮仙女送一條猫仔个事情老老實實講分佢聽。
「麽个！得到龍宮个猫仔！」
　貪心个丈人哀，想愛遽遽得到該條猫仔。
「噯，失禮，該條猫仔借𠊎！」
　講了後兩儕就跈等大細郎轉去屋下。
　大婿郎摎妹仔無法度，
　摎二老講：「若係一定愛借，無該斯借你二、三日好啦，毋過一日斯做得分佢食一合紅豆。」
　就摎猫仔交分佢。
（該載，有這條猫仔就會變有錢人了。）
　二老轉到屋下後，想愛遽遽拿一合紅豆分猫仔食，
（等下，假使食一合屙一升金幣，該分佢食五合該毋係就會屙五升个金幣了！）
　所以強逼猫仔食五合紅豆，猫仔就屙當臭个屎，像一座山恁高，過後就死忒了。
「麽个東西？麽个東西？屙金幣無半滴，屙臭屎像山恁高。」
　丈人老摎丈人哀膦火著，走去大婿郎屋下大聲駡佢：
「還敢哦，連𠊎兩儕你也敢騙！」
「無該種事情，無可能騙你。」
　大婿郎黏時去農民丈人屋下，摎死忒个猫仔拿轉來。
「還衰過，請你原諒𠊎。」
　大婿郎摎猫仔拿轉去埋在天墀坪，逐日拜佢，
　二、三日後，埋猫該位生出南天樹，一下仔變大，打了當多个果子。
　大婿郎看著就想到得人惜个猫仔个目珠，試搖該樹仔，
　南天跌到滿樹下，毋知仰般樹子嗄變做黃金。
　因為這兜黄金大婿郎變大有錢人，大妹仔在三个妹裡肚生活過到最幸福。

煞咧

註：龍宮仙女係戴龍宮城个公主。
若係對自己抑係同事好、親切佢就會在龍宮招待並拿寶物送人，盡大方个女性。
佢因為浦島太郎（Taro Urashima）出名，輒常出現在古老傳說故事中。

龍宮城係龍王抑係龍神戴个宮殿。
在印度，納迦(龍王)个首都係在地下，聽講宮殿比天上、地上、地下个任何其他宮殿都還較豪華。
在日本神話肚，海底有一座海神廟，妹仔豐田真姬現龍身降細嬰兒。
除了浦島太郎摎龍宮城龍宮仙女个故事外，童話“龍宮童子”摎“龍宮使女”故事裡肚，在深淵底下都有大座屋，
善有必善報。
龍宮城堡係該隻世界（死者个國家），又做得講往生者个世界。