福娘童話集 > 日本昔話 > １月



無用个地位

・日本語　  ・中国語　・客家語

・日本語＆中国語 　・日本語＆客家語

客家語 : 鄧文政(ten33 vun55 zhin11)

　頭擺頭擺，有一隻山肚个村莊，戴一個細倈仔名仔安到伊助，非常老實个男仔人。
　因為沒半個親人，所以一日到暗愛靠鄰舍接濟正有辦法過日仔。

　有一年，伊助去京城做長年(戴在人屋下，幫忙做事。)，
　佢做長年个位所係地位當高个公卿屋下。
　伊助歸日在該㧡水、剖樵、掃馬寮，無停跎。
　經過幾年，歲數多了，想到愛轉故鄉，就走去摎公卿講其願望。
「請你恩准，𠊎告老返鄉。」
「仰般？事忒辛苦係無？」
「毋係，想轉故鄉摎懷念个人共下過日仔。」
「有影無？」
　公卿因為伊助平時恁煞猛做事，想愛授佢地位，風風光光衣錦還鄉作為答謝。
「伊助，行兼來！」
　公卿摎伊助个頭那頂戴帽仔。
「伊助，這係象徵有地位个東西，你愛隨時帶在身上喔！」
「ha！𠊎知！」
　帽仔戴等个伊助感覺自家變到當偉大个樣仔。

　等佢轉到離開幾下十年个故鄉，村人著驚一下毋過又當歡喜。
「伊助先生，還派頭哦！」
「真有出息，伊助係𠊎俚村莊个光榮。」
　受到大家恁樣阿𧩣个伊助，有兜沙鼻，講：
「無麽个哪！」
　從該以後伊助開始買入大片土地，起座大屋，
　摎佢熟事个朋友問伊助講：
「伊助，該兜園你愛種麽个東西？」
「噯！還毋會講話哦！」
「．．．唉！」
　對伊助這種沙鼻摝天个態度，熟事个朋友嗄發痴驚，
　村民起頭當歡迎佢摎佢𢯭手个人當多，無幾久大家就毋想接近佢。

　有一日，伊助聽到村民企等閒談講：
「伊助先生仰會恁尚勝哪？」
「得到麽个地位，人就變忒了，該就像妖怪樣。」
伊助啊聲
「有、有影無？原來係這頂帽，𠊎、𠊎就．．．」
　伊助黏時去京城。
「麼个？地位愛退還𠊎？」
「係，公卿大人。𠊎想在故鄉摎大家好好過日仔，
　毋過因為得到地位个関係，一个人孤弧栖栖過日仔。
　像𠊎這種人，地位係無用个寶物(準講有也會變障礙物)，所以愛還你。」
　地位還忒个伊助完全變轉老百姓，著等百姓个衫褲轉去鄉村。
「仰會打扮到恁樣？」
「帽仔、衫褲、地位做下還淨淨了。」
　伊助講忒就去園項開始做事。
　自該擺以後，伊助摎村民感情當好，互相幫忙、快樂過日了。

煞咧